Першае месца ў рэйтынгу "Newsweek” заняла Фінляндыя. ЗША патрапілі на 11-е месца. Замыкаюць сьпіс афрыканскія краіны Камэрун, Нігерыя і Буркіна-Фасо. Месцы суседзяў Беларусі разьмеркаваліся наступным чынам: Польшча – 29-я, Літва –34-я, Латвія – 36-я, Украіна – 49-я, Расея – 51-я. Беларусь са сваім 56-м месцам адстала ад усіх суседзяў.

  Аднак нізкае месца Беларусі ў агульным рэйтынгу абумоўлена ў значнай ступені надзвычай нізкай ацэнкай палітычнай сытуацыі ў краіне, паводле гэтага паказьніку Беларусь апынулася амаль у самым канцы сьпісу – на 91-м месцы. Паводле іншых паказьнікаў ацэнкі становішча ў краіне не такія ўжо і кепскія, паводле паказьнікаў адукацыі, якасьці жыцьця, дынамізму эканомікі Беларусь займае 34-35 месца.

  Табліца дае ўяўленьне пра адпаведныя паказьнікі Беларусі і яе суседзяў (месцы ў адпаведных катэгорыях сярод 100 краін сьвету):

	Адукацыя	Ахова здароўя	Якасьць жыцьця	Дынамізм эканомікі	Палітычнае становішча
Беларусь	35	66	35	34	91
Польшча	17	34	36	45	18
Літва	28	61	39	41	26
Латвія	25	52	41	53	38
Расея	31	75	50	36	75
Украіна	40	75	40	66	50

    
  Паводле табліцы, параўнальнае становішча Беларусі сярод суседзяў выглядае больш складаным. Яна аказваецца лідэрам паводле дынамізму эканомікі, хаця варта заўважыць, што гэты паказьнік вымярае не эканамічны стан сам па сабе, а тэмп пераўтварэньняў. Іншыя краіны-суседзі так ці інакш прайшлі стадыю рэформаў, Беларусь іх толькі нарэшце пачынае, што і знайшло адлюстраваньне ў адпаведным рэйтынгу.

  Паводле адукацыі Беларусь апярэджвае Ўкраіну, крыху адстае ад Расеі і Літвы і значна – ад Латвіі і асабліва Польшчы. Паводле ацэнак сыстэмы аховы здароўя Беларусь мае лепшыя паказьнікі, чым Расея і Ўкраіна і крыху адстае ад Літвы.

  Якасьць жыцьця ў Беларусі – бліжэй да эўрапейскіх суседзяў, чым да ўсходняга і паўднёвага. Ну а палітычнае становішча... як і было сказана: Беларусь у гэтым сэнсе аўтсайдэр ня толькі ў рэгіёне, але і ў сьвеце.