ЦВК дапаможа? - 10 Марта 2010

   Кіраўнік ініцыятыўнай групы па вылучэнні кандыдатам ў дэпутаты па Станцыйнай выбарчай акрузе №25 у Мазырскі раённы Савет дэпутатаў Уладзімір Целепун звярнуўся да Старшыні Цэнтральнай камісіі Рэспублікі Беларусь па выбарах і правядзенні рэспубліканскіх рэферэндумаў Ярмошынай Л.М з наступным лістом:

"Паважаная Лідзія Міхайлаўна!

   Згодна арт. 66, ч. 2 Выбарчага кодэкса "…Пры падачы дакументаў асоба, якая вылучана кандыдатам у дэпутаты, прад’яўляе пашпарт грамадзяніна Рэспублікі Беларусь”.

Але цяперашняе выбарчае заканадаўства зусім не тлумачыць, як падаваць дакументы на рэгістрацыю кандыдатамі тым, хто па незалежных ад сябе прычынах (шпіталізацыя, траўма, стыхійнае бедства і г.д.) не можа асабіста зрабіць гэта ў кароткі дазволены законам прамежак часу.

   У сувязі са знаходжаннем у вайсковым шпіталі (432-гі Галоўны ваенны медыцынскі клінічны цэнтр Узброеных Сіл Рэспублікі Беларусь, г. Мінск) ваеннаслужачы в/ч 48960 Вячорка Францішак Валянцінавіч, які вылучаецца ў дэпутаты Мазырскага раённага Савета дэпутатаў 26 склікання па Станцыйнай выбарчай акрузе №25 шляхам збору подпісаў грамадзян, магчыма, не зможа асабіста падаць дакументы ў Мазырскую раённую выбарчую камісію ва ўстаноўленыя тэрміны.

   Калі ж Ф.Вячорка будзе вернуты ў вайсковую часць да заканчэння тэрміну падачы дакументаў на рэгістрацыю, магчыма, што камандаванне ў парушэнне заканадаўства не дазволіць яму наведаць камісію. Ёсць абскарджаны ў ваенную пракуратуру прэцэдэнт, калі в.а. камандзіра часткі маёр У.І.Ігнацік у парушэнне заканадаўства і без абгрунтавання не дазволіў збіраць подпісы за Ф.Вячорку ў часці.
ПРАШУ даць рэкамендацыі і растлумачыць парадак падачы дакументаў на рэгістрацыю ў гэтым выпадку.

   Прашу даць дазвол на падачу дакументаў для рэгістрацыі кандыдатам у дэпутаты Вячоркі Ф. В. мне, Целепуну Уладзіміру Андрэевічу, кіраўніку яго ініцыятыўнай групы №9.

   Спадзяюся на станоўчае рашэнне і спрыянне з Вашага боку забеспячэнню канстытуцыйнага і выбарчага права грамадзяніна Рэспублікі Беларусь Вячоркі Францішка Валянцінавіча.

З павагай і святочнымі пажаданнямі 8 сакавіка Вас і усіх жанчын ЦВК
Уладзімір Целяпун.”