Асамблея НДА азнаёміла грамадзкасьць і прадстаўнікоў дыпляматычнага корпусу краінаў ЭЗ з вынікамі свайго маніторынга “Прававы стан няўрадавых арганізацыяў у 2009 годзе”. Паводле выступоўцаў з Асамблеі НДА, на дадзены момант улада адышла ад практыкі кропкавых пазытыўных зьменаў у сфэры свабоды асацыяцыяў. Цяпер лібэралізацыя адбываецца выключна на ўзроўні рыторыкі.

   Старшыня Асамблеі НДА Сяргей Мацкевіч зазначае, што апошнім часам назіраецца небясьпечная тэндэнцыя, калі ўлады спрабуюць любыя зьмены выдаць за пазытыўныя. Напрыклад, новая вэрсія Закона “Аб грамадзкіх арганізацыях” рыхтуецца без уліка меркаваньня грамадзянскага сэктару. Прыняцьце дадзенага Закона можа істотна пагоршыць сытуацыю са свабодай асацыяцыяў у краіне. “Пасьля прыпыненьня санкцыяў ЭЗ у дачыненьні да шэрагу беларускіх чыноўнікаў прайшло паўгады. Але ніводнае з прынцыповых для грамадзянскай супольнасьці пытаньняў не было вырашанае ўладамі. Па-першае, дагэтуль не скасаваная адказнасьць за дзейнасьць ад імя незарэгістраванай арганізацыі па артыкуле 193-1 КК. Па-другое, пытаньне рэгістрацыі грамадзкіх арганізацыяў па-ранейшаму застаецца праблемным. Па-трэцяе, ніякіх зрухаў па стварэньні ільготных ставак арэнды памяшканьняў для НДА таксама не заўважаецца”, -- падсумаваў Сяргей Мацкевіч.

  Кіраўніца Выканаўчага Бюро Асамблеі Алёна Валынец азнаёміла прысутных з хадой кампаніі “СТОП 193-1”. На думку выступоўцы, грамадзянскія акцыі беларускіх НДА і ўвага міжнароднай супольнасьці да праблемы ўжываньня адыёзнага артыкула Крымінальнага Кодэкса граюць важную ролю. Але, на вялікі жаль, беларускія ўлады ня робяць практычных крокаў па вырашэньні праблемы, абмяжоўваючыся адпіскамі.

    Прадстаўнікі Асамблеі, аднак, не губляюць асьцярожнага аптымізму адносна верагоднасьці паляпшэньня стасункаў паміж грамадзянскай супольнасьцю і дзяржавай. Наладжваньне канструктыўных узаемаадносінаў зь дзяржаўнымі органамі магчымае пры выпрацоўцы супольнай з трэцім сэктарам ідэйнай плятформы. Такой плятформай, паводле сябраў Асамблеі НДА, можа стаць рамкавы дакумэнт “Канцэпцыя разьвіцьця грамадзянскай супольнасьці ў Беларусі”.

   Старшыня БХК Алег Гулак падкрэсьліў, што распрацаваную Асамблеяй НДА Канцэпцыю яшчэ рана называць базавым дакумэнтам для наладжваньня адносінаў паміж дзяржавай і НДА. Аднак дасягненьне пагадненьняў, зафіксаваных у Канцэпцыі, дапаможа і ўладам, і грамадзянскай супольнасьці дасягнуць пэўнага ўзроўня паразуменьня, ад якога выйграе ўсё грамадзтва.

   На брыфінгу “Прававы стан няўрадавых арганізацыяў у 2009 годзе” з дакладамі на праваабарончую тэматыку выступілі кіраўнік Асамблеі НДА Сяргей Мацкевіч, кіраўніца Выканаўчага Бюро Асамблеі Алёна Валынец, палітоляг Юры Чавусаў, старшыня БХК Алег Гулак, прадстаўнік ПЦ “Вясна” Валянцін Стэфановіч. Ад дыпляматычнага корпуса краінаў ЭЗ на мерапрыемстве прысутнічалі новая амбасадарка Вялікай Брытаніі Розмары Томас, амбасадар Швэцыі Стэфан Эрыксан, дыпляматы з амбасады Польшчы, Эўракамісіі, АБСЭ.