Учора ў Маскве прайшла сустрэча прэзыдэнтаў Расеі
і Беларусі Дзьмітрыя Мядзьведзева і Аляксандра Лукашэнкі.
Высьветлілася, што ў Беларусі зьявілася новая просьба — выдзеліць 100
мільярдаў расейскіх рублёў крэдыту.
Беларускі бок аргумэнтуе яе
магчымым пераходам да разьлікаў ва ўзаемным гандлі ў расейскіх рублях.
“Бягучы год у расейска-беларускіх дачыненьнях быў
няпросты, але па яго выніках мы здолелі выйсьці на заплянаваныя
паказьнікі”, — такую думку выказаў сёньня прэзыдэнт Расеі падчас
сустрэчы ў Крамлі са сваім беларускім калегам:
“Калі казаць пра дынаміку расейска-беларускага супрацоўніцтва, дык яна была нядрэннай. Устойліва рос таваразварот”.
Загадчык аддзелу Беларусі Інстытуту краін СНД у Маскве Аляксандар Фадзееў гаворыць, што на лічбы беларуска-расейскага гандлю трэба глядзець уважліва:
“Рост
таварнай масы за 2008 год — гэта толькі крыху больш за 11%. А пераважна
рэкордныя лічбы — гэта кошт тых энэрганосьбітаў, якія імпартуе
Беларусь. Таму тут гаворка ідзе не пра значнае павелічэньне таварнай
масы альбо паслуг, а пра тое, што павысілася цана на іх”.
Аляксандар Лукашэнка на самым пачатку размовы з расейскім калегам казаў, што Беларусь нічога ня просіць у Расейскай Фэдэрацыі:
“Публічна
хачу адразу адмесьці тут усе інсынуацыі, якія гучалі апошнім часам з
нагоды таго, што Лукашэнка амаль на каленях паўзе ў Крэмль, каб нешта
выпрасіць. Адразу хачу сказаць, што мы абсалютна сёньня нічога не
зьбіраемся прасіць”.
Аднак сёньня ж намесьнік міністра фінансаў Расеі Дзьмітры Панкін
публічна заявіў, што Масква атрымала зь Менску ліст з просьбай
выдзеліць 100 мільярдаў расейскіх рублёў крэдыту. А аглядальнікі
зьвяртаюць увагу на тое, што пасьля сустрэчы двух прэзыдэнтаў у фармаце
сам-насам да іх далучыліся сярод іншых і кіраўнікі Цэнтрабанку Расеі і
Нацыянальнага банку Беларусі.
Аляксандар Фадзееў зьвяртае ўвагу на гэту супярэчлівасьць:
“Лукашэнка
адмаўляе, што беларускі бок прасіў нешта ў Расеі. Пра гэта ён заявіў
афіцыйна на гэтых перамовах. З аднаго боку, паведамляецца, што такі
ліст з просьбай аб 100 мільярдах расейскіх рублёў ёсьць. А Лукашэнка
адмаўляецца ад гэтага. Так што мне даволі складана камэнтаваць гэта”.
Кіраўнік дасьледчага цэнтру Мізэса Яраслаў Раманчук лічыць, што беларускае кіраўніцтва сваёй чарговай просьбай усё глыбей заганяе сябе ў залежнасьць ад усходняга суседа:
“Беларускі
ўрад чапляецца за саломку. Ён ня хоча рэформаў, а бачыць будучыню
Беларусі толькі ў даўгавой яме, якую сам сабе і збудаваў. А гэта тое,
на што і разьлічвае Крэмль — уцягнуць Беларусь у такія ўзаемаадносіны,
выхад зь якіх будзе толькі ў палітычных кампрамісах на карысьць Расеі”.
У лістападзе 2008 году Расея і Беларусь падпісалі
пагадненьне, што Беларусь атрымае 2 мільярды даляраў ЗША як
стабілізацыйны крэдыт у 2008-2009 гадах. Першую частку крэдыту — 1
мільярд даляраў — Беларусь ужо атрымала. Другую Расея павінна
пералічыць да 28 лютага. Крэдыт выдаецца на 15 гадоў з 5-гадовай
адтэрміноўкай па асноўным доўгу паводле стаўкі LIBOR+3%.
У
сьнежні 2007 году Расея выдзеліла Беларусі 1,5 мільярда
стабілізацыйнага крэдыту на 15 гадоў пад LIBOR+0,75% з адтэрміноўкай
выплаты на 5 гадоў.