Напярэдадні
сустрэчы кіраўнікоў Беларусі і Расеі ў Маскве 22 сьнежня кіраўнік
прэзыдэнцкай прэс-службы Павал Лёгкі абверг чуткі ў расейскай прэсе,
што Аляксандар Лукашэнка нібыта "зламаўся і ўгаворваў" прэзыдэнта
Дзьмітрыя Мядзьведзева сустрэцца 22 сьнежня ў Маскве.
Паводле Паўла Лёгкага,Аляксандар Лукашэнка
“ніколі і нікому не навязваўся і ня мае звычкі напрошвацца да некага на
сустрэчы”.
Спадар Лёгкі абвінаваціў расейскія мэдыі ў тым,
што яны распаўсюджваюць плёткі. Маўляў, гэтая “гнюсная шматгадовая
традыцыя "выкіду" дэзынфармацыі са спасылкай на ананімныя крамлёўскія
крыніцы” адбываецца напярэдадні кожнай сустрэчы.
У пятніцу
А.Лукашэнка згуляў у Маскве ў хакей у складзе “Зборнай зорак сьвету”
супраць каманды "Газпром экспарт" і прайграў. Ён не паехаў на
нефармальную сустрэчу прэзыдэнтаў краінаў СНД, якая ў гэты дзень
адбылася на курорце Баравое ў Казахстане.
Таксама кіраўнік Беларусі заявіў, што зьвярнуўся да ЗША аб выдзяленьні крэдыту на 5 мільярдаў даляраў.
Палітоляг Андрэй Фёдараў адзначыў, што нічога добрага не чакае ад беларуска-расейскай сустрэчы:
“Масква
будзе ціснуць па ўсіх кірунках. Пасьля таго, як мы даведаліся, што
Беларусь прасіла ў ЗША 5 мільярдаў даляраў. Гэта значыць, што сапраўды
стан рэчаў ня вельмі добры. І таму, безумоўна, Беларусь будзе ў ролі
просьбіткі ці то зьмяншэньня кошту газу, ці чарговага крэдыту. Тады ў
Масквы зьяўляецца магчымасьць выстаўляць сустрэчныя патрабаваньні. І я
баюся, што ў гэтых варунках афіцыйнаму Менску будзе цяжка адмовіцца ад
іх”.
Як паведамілі ў офісе саюзнага дзяржсакратара Паўла
Барадзіна, гэта будзе не пасяджэньне дзяржсавету саюзнай дзяржавы, а
“проста двухбаковая сустрэча”.
Яна павінна была адбыцца ў
рамках пасяджэньня дзяржсавету “саюзнай дзяржавы” Беларусі і Расеі
спачатку 3-га лістапада, а потым 1-га сьнежня ў Маскве. Аднак гэтыя
саміты зрываліся. Візыт Аляксандра Лукашэнкі ў Маскву быў перанесены. І
ў часе тэлефоннай размовы 17 сьнежня бакі дамовіліся сустрэцца 22
сьнежня.
Спрэчкі выклікаў парадак дня. Беларускі бок абвінаваціў расейцаў у тым, што яны прапануюць рутыну, а не “сур'ёзны зьмест”.
Паводле
расейскіх мэдыяў, раздражненьне Аляксандра Лукашэнкі выклікаў праект
Канстытуцыйнага акту так званай саюзнай дзяржавы, у якой кіраўніку
Беларусі адводзіцца пасада віцэ-прэзыдэнта.
“Такой
афіцыйнай прапановы няма. Гэта як бы розныя канструкцыі. Такога роду
канструкцыі сапраўды пэрыядычна ўзьнікаюць у рамках агульнай дыскусіі
пра тое, а як жа ўсё ж выбрацца з гэтага тупіку ў разьвіцьці саюзнай
дзяржавы. Але афіцыйна ніхто не прапаноўваў Аляксандру Лукашэнку быць
віцэ-прэзыдэнтам. А некаму прэзыдэнтам. Гэта пакуль не адбылося. Проста
нам трэба зразумець, што мы далей зьбіраемся рабіць. Мы маглі б прыняць
рашэньне з адкладзеным тэрмінам рэалізацыі. Гэтак жа як, напрыклад, на
такі ўзор зрабілі ў Кітаі, калі дамовіліся з Ганконгам”.
Асноўнае
пытаньне, якое некалькі разоў уздымалася і будзе абмеркавана цяпер у
Маскве, паводле Аляксандра Лукашэнкі, – цана на расейскі газ. Ён
заявіў, што ня можа прыняць цану 200-240 даляраў за тысячу кубамэтраў.
Паводле віцэ-прэм’ера Беларусі Ўладзімера Сямашкі, беларускі бок “ваюе
за 140 даляраў”.