Сёньня пад час наведваньня імпрэзы на “Лініі Сталіна”Аляксандар Лукашэнка заявіў, што выбух пад час канцэрту 4 ліпеня ня быў скіраваны супраць яго. ”Для іх гэта было б добра, дастаць прэзыдэнта, але ж яго ахоўваюць”, - сказаў кіраўнік Беларусі. Ён адзначыў, што знаходзіўся праз дарогу і наўрад ці мог пацярпець. А.Лукашэнка заявіў: ”Хочаце ваяваць – рабіце гэта лоб у лоб”. Камэнтуючы выказваньні апазыцыйных палітыкаў, якія засьцераглі ўлады ад выкарыстаньня выбуху дзеля новай хвалі барацьбы з палітычнымі апанэнтамі, А.Лукашэнка заявіў:

“Што тычыцца закручваньня гаек. А навошта нам сёньня нешта закручваць? Што такое адбылося ў краіне, каб закручваць гайкі? Я разумею, на злодзеі і шапка гарыць, таму пачалі хуценька некаторыя палітыкі займацца перапеўкамі. Але ў гэтым выпадку, гэта хоць і пытаньне палітычнае, але разьбірацца мы будзем па законе. Ня важна, хто гэта будзе: лідэры, ня лідэры, значныя яны для Захаду ці для Ўсходу... Гайкі мы будзем заварочваць на галовах у тых, хто да гэтага мае дачыненьне”.

Ён заявіў, што ніякія правакацыі не дапамогуць сапсаваць сьвята, нават калі яно некаму не падабаецца. Маўляў, у краіне “ёсьць людзі, якім сьвята не падабаецца, і іх ведаюць у твар”. Лукашэнка таксама сказаў, што не пакінуў канцэрт пасьля выбуху, каб не пачалася паніка.

Прадстаўнікі апазыцыі заклікалі да незалежнага грамадзкага расьсьледаваньня абставінаў выбуху. Юрыст Ігар Рынкевіч сказаў:

“Падзеі з выбухам, ужо бачна паводле камэнтароў спадара Лукашэнкі, будуць скіраваны на апазыцыю. Таму вырашана арганізаваць незалежнае, грамадзкае расьсьледаваньне. Мы бачым тут пэўныя паралелі з выпадкамі, якія мелі месца ў верасьні 2005 года. Напярэдадні прэзыдэнцкіх выбараў гэтыя выбухі былі, што дало глебу для ўзмацненьня крымінальнага заканадаўства. У кватэрах апазыцыянэраў шукалі выбуховыя кампанэнты. Віцебскіх злачынцаў дагэтуль не знайшлі”.

Камэнтуючы дзеяньні сілавых структураў і тое, што канцэрт працягваўся, нягледзячы на выбух, юрыст Алег Воўчак мяркуе, што тут ёсьць пытаньні да міністра ўнутраных справаў:

“Пасьля “жывога шчыта” і цяпер відавочна, што МУС вельмі многа траціць намаганьняў на барацьбу з апазыцыяй, а не на меры бясьпекі насельніцтва. І яны павінна задумацца, як наступны раз праводзіць такія сьвяты. Бо гэта мінус усёй міліцыі, усёй праваахоўнай сыстэме, якія дапусьцілі такія выбухі ў цэнтры горада”.

У менскіх лякарнях застаюцца 40 пацярпелых ад выбуху. Галоўны доктар менскага шпіталю хуткай дапамогі Віктар Сірэнка сказаў, што ў ягоным шпіталі знаходзяцца чацьвёра пацярпелых. Стан аднаго з параненых цяжкі, але стабільны.

“Гэта хлопчык 18-ці гадоў. Ён атрымаў раненьне, якое пранікае ў брушную поласьць з пашкоджаньнем печані. І ранячы снарад знаходзіўся каля ніжняй полай вены. Мы выявілі, што там назіраецца прарыў гэтай вены. Пайшлі на апэрацыю. Таму ён знаходзіцца ў цяжкім стане. Але ён пры сьвядомасьці, дыханьне падтрымліваецца апаратам.

Характар зраненьня адзін – гэта мінна-выбуховае зраненьне. Мінна-выбуховая траўма адносіцца заўсёды да катэгорыі цяжкіх”.