"Улада і грамадзтва застаюцца антыдэмакратычнымі і мілітарнымі" - 3 Июля 2008

У Беларусі адзначаюць галоўнае дзяржаўнае сьвята. У Менску будуць парад, народныя гуляньні, салют. Стылістыка дзяржаўных сьвятаў у сучаснай Беларус.

Афіцыйная назва сьвята – Дзень незалежнасьці (Дзень рэспублікі). Адзначаецца з 1997 году ў дзень вызваленьня Менску ад нацыстаў у 1944 годзе. Рашэньне аб пераносе сьвята з 27 ліпеня, калі ў 1990 году была абвешчаная Дэклярацыя а дзяржаўным сувэрэнітэце Беларусі, было ініцыяванае А. Лукашэнкам і ўхваленае на рэфэрэндуме ў лістападзе 2006 году.

У першыя гады свайго прэзыдэнцтва А. Лукашэнка на Дзень незалежнасьці выступаў па-беларуску, пазьней перайшоў на расейскую мову.

Сёньня ў сталіцы Беларусі пройдуць вайсковы парад, шэсьці спартоўцаў, народныя гуляньні, увечары чакаецца салют.

“Не сьвята, а дэманстрацыя моцы і велічы ўладаў”

Вячаслаў Ракіцкі

Пра зьмест і форму сьвяткаваньня Дня незалежнасьці гаворыць філёзаф Валянцін Акудовіч.

“Дзень незалежнасьці 3 ліпеня -- гэта штучна створанае сьвята, і на яго беларусы забудуцца, як толькі ў краіне зьменіцца ўлада.

Гэтаксама, як ужо забыліся на дзень кастрычніцкай рэвалюцыі.

Што да формы сьвяткаваньня, дык яна (і гэта відавочна ўсім) ёсьць копіяй сьвятаў расейска-савецкай імпэрыі. Але і паводле сутнасьці гэта сьвята такое ж самае, бо гэта і не сьвята, а дэманстрацыя моцы і велічы ўладаў. І разам з тым еднасьці беларускага народу вакол гэтай улады. Пра апошняе выразна сьведчыць сьпяваньне гімна ўсёй краінай. Які фарс!.. Хацеў бы я ведаць, ці хаця б адзін з тысячы беларусаў насамрэч памятае тэкст гімна?! Дарэчы, я зусім ня ўпэўнены, што і сам Аляксандар Рыгоравіч ведае яго напамяць.

Форма і зьмест сьвяткаваньня Дня незалежнасьці яскрава робіць відавочным адзін вельмі сумны для нас факт: і беларуская ўлада, і беларускае грамадзтва ў сваёй сутнасьці ўсё яшчэ застаюцца антыдэмакратычнымі і мілітарнымі. Хіба мы можам уявіць калёны танкаў на вуліцах Лёндану, Прагі, Бэрліну?.. Рытарычнае пытаньне”.

Радыё Свабода