Навошта шыць? Многія людзі запытваюць нас, як і дзе прыдбаць нацыянальны сьцяг. Апошнім часам попыт на бел-чырвона-белыя сьцягі моцна ўзрос і набыць сьцяг надта цяжка. А вось пашыць - досыць проста. Нам усім патрэбна больш сьцягоў. Таму - шыйце, сабе і сябрам. Падрыхтоўка Патрэбная, натуральна, тканіна белая і чырвоная. Паводле традыцыі сьцяг мае прапорцыю 2:1, значыцца, калі вы хочаце атрымаць сьцяг 1 мэтар у даўжыню, дык вам спатрэбяцца: чырвоная палоска шырынёю прыблізна 34 см; дзьве белыя палоскі па 33.5 см. Даўжыня ўсіх палосак мае быць прыблізна 1.06 м. Для таго, каб хутка атрымаць акуратны сьцяг лепш за ўсё выкарыстаць швачную машынку, рукамі таксама магчыма, але часу гэта забярэ значна больш. Спатрэбіцца прас. Дарэчы, тканіну варта папрасаваць перад шыцьцём, бо так будзе зручней. Шыцьцё Cшываем дзьве палоскі наступным чынам: Мал.1 Накладаем адну на другую са зьмяшчэньнем каля 0.5 см, прашываем як паказана на мал.1, згінаем і праходзім па перагіну прасам (мал.2). Мал.2 Потым перагінаем палоску - у нашым выпадку чырвоную - мал.3, перагортваем, каб уверсе была белая тканіна, сшываем ды ізноў замацоўваем перагін прасам. Усе гэтыя згінаньні патрэбныя, каб навонку не засталося абрэзаных краёў тканіны, якія з часам абтрэплюцца і папсуюць выгляд. Цяпер, у гэткі ж спосаб прышываем трэцюю палоску. Далей неабходна падагнуць і прашыць усе краі сьцягу. Урэшце, робім рукаво для тронку - проста загінаем край (прыблізна 3-4 см, але можаце прымерыць са сваім тронкам) і прашываем, лепш двойчы. Гатова! Тронак Для тронку лепш за ўсё падыходзіць тэлескапічная вуда. Зрэшты, калі сьцяг будзе вывешаны ў памяшканьні, то рыбалоўнае снадзіва будзе глядзецца не зусім дарэчна. У такім выпадку сьцяг можна прышпіліць да шпалераў булаўкамі, альбо зрабіць драўляны тронак з падстаўкай.
|